Doruntina flet frëngjisht në kalanë e Gjirokastrës

Doruntina flet frëngjisht në kalanë e Gjirokastrës

Një trupë franceze e teatrit skenik, ka dhënë një shfaqje teatrale në skenën e improvizuar të kalasë së Argjirosë. Në këtë mënyrë kalaja e Gjirokastrës është bërë sërish arenë e shfaqjeve kulturore me karakter internacional zanafilla e të cilës e ka në muajin korrik të këtij viti kur sopranoja e mirënjohur shqiptare Inva Mula, performoi me mjeshtëri këngët burimore tradicionale shqiptare. E veçanta e shfaqjes së sotme “ Kush e solli Doruntinën” është se ajo ka për protagonistë kryesorë aktorë francezë të sapo diplomuar për artet dramatike në Paris dhe karrierën e tyre skenike ata e nisin nga kalaja shekullore.Ka qenë një iniciativë e “Shoqatës franko-shqiptare Argjiro” që këmbënguli se pjesa teatrale “Kush e solli Doruntinën” mund të vihej mjaft mirë në skenë në kalanë e Gjirokastrës. Për regjisoren e shfaqjes Anjeza Mara e cila është një prej të diplomuarve për artet skenike në Francë, shfaqja e dramës në fjalë në kalanë e Gjirokastrës merr një dimension mjaft real për vetë faktin se skenografia është e gjallë me masive guresh për karakterin që ka kjo pjesë. Adaptimi i veprës së Ismail Kadaresë në gjuhën frënge ka për autor përveçse regjisoren e shfaqjes Mara edhe përkthyesin e mirënjohur Jusuf Vrioni. Drama “ Kush e solli Doruntinën” përgjatë 60 minutave të saj është luajtur nga një trupë prej tetë aktorësh të rinj francezë që nuk i kalonin të 25-at dhe është duartrokitur nga publiku artdashës gjirokastrit. Veprimtaria e sotme është kryer nën patronazhin e deputetit të Gjirokastrës Genc Ruli dhe u mbështet nga Ministria e Kulturës dhe sponsori gjeneral Banka Popullore e cila është pjesë e grupit francez të bankave “Generale Societe”. Aktivitetet kulturore në kalanë e Gjirokastrës do të jenë intensive përgjatë muajit shtator ku është parashikuar që të organizohet edhe një takim i muzikës internacionale të folkut, xhazit, dhe muzikës klasike.